Хот, суурины ус хангамж, ариутгах татуургын ашиглалт үйлчилгээг зохицуулах зөвлөл

Хот, суурины ус хангамж, ариутгах татуургын ашиглалт үйлчилгээг зохицуулах зөвлөл нь Монгол Улсын Засгийн газрын 2012 оны 02 сарын 15-ны өдрийн 46 дугаар, 05 сарын 30-ны өдрийн 183 дугаар тогтоолын дагуу байгуулагдсан бие даасан, хараат бус хамтын удирдлагын байгууллага юм. Зөвлөл нь хот, суурины ус хангамж, ариутгах татуургын ашиглалтын тарифыг тогтоох, хуулийн этгээдэд тусгай зөвшөөрөл олгох, шийдвэр гаргах чиг үүрэгтэй байхаас гадна хэрэглэгч, салбарын мэргэжлийн төрийн бус байгууллагын төлөөлөл бүхий зохицуулах байгууллага юм.

Үйл ажиллагаа нь холбогдох хуулиуд, Засгийн газрын 2012 оны 46 дугаар тогтоолоор батлагдсан дүрмийн дагуу явагдах бөгөөд хүн ам, үйлдвэр, аж ахуйн нэгжүүдийг эрүүл ахуйн стандартад нийцсэн цэвэр усаар хангах, бохир усыг эргүүлэн ашиглах үйлчилгээг сайжруулах, усны алдагдлыг бууруулах, санхүүгийн үр ашгийг нэмэгдүүлэх болон олон улсын сайн туршлага нэвтрүүлэхийг үндсэн зорилго болгон ажиллаж байна.