Монгол Нэхмэл ХК

Монгол Нэхмэл ХК нь 1934 онд Монголын ноос боловсруулах аж үйлдвэрийн анхны машинт үйлдвэрийн болох «Эсгий цэмбэний фабрик» нэртэй байгуулагдаж, 1959 онд бие даасан Ноосон нэхмэлийн үйлдвэр болон, 1992 онд хувьцаат компани болсон түүхэн аж ахуйн нэгж юм. Нарийн бүдүүн ноос будах, утас ээрэх, нэхэх, гүйцээн боловсруулах үндсэн цехүүд, лаборатори бүхий ноос, ноолууран ээрмэл, нэхмэл, сүлжмэлийн бүрэн шат дамжлагат үйлдвэр бөгөөд 2000 оноос машин технологи шинэчлэж жилд 130000 метр төрөл бүрийн даавуу үйлдвэрлэдэг. Ээрмэлийн салбар нь Японы KYOWA, MURATEC тоног төхөөрөмжөөр тоноглогдсон 75000 кг жилийн хүчин чадалтай утас ээрэх үйлдвэр юм. Будах цех жилд 40000 кг түүхий ноос, ноолуур өнгө гаргадаг. Сүлжмэлийн үйлдвэрлэл нь Герман улсын STOLL, Японы Shima Seiki, Италийн COMPLETE сүлжих машинаар жилд 50000 ш сүлжмэл бүтээгдэхүүн үйлдвэрлэнэ. Компани нь ямааны ноолуур, сарлагийн хөөвөр, тэмээний ноос, хонины ноосоор хөнжил, плед, алчуур, шаль, даавуу, цамц, пальто зэрэг 600 гаруй төрлийн нэхмэл, сүлжмэл бүтээгдэхүүн үйлдвэрлэж, байгаль орчинд ээлтэй, тогтвортой, ил тод, ёс зүйтэй корпораци болохыг эрхэм зорилт болгон ажиллаж байна.