Шарын гол ХК

Шарын гол ХК нь Дархан-Уул аймгийн Шарын гол сумын нутагт далайн түвшнөөс дээш 920 м-ийн өндөрт байрлах нүүрсний ил уурхай юм. Уурхай нь Улаанбаатар хотоос 240 км, Дархан хотоос 50 км-ийн зайтай oршиж, төмөр зам, авто замаар болон 110 кв-ийн шугамаар дамжуулан түлш хэрэглэгчдэд холбогдсон. 1965 оны 4-р сарын 6-нд анх ашиглалтанд орсон уурхай нь Б-3 маркийн өөрөө шатамхай нүүрс олборлодог бөгөөд одоогийн байдлаар 460 гаруй ажиллагсадтайгаар үйл ажиллагаа явуулж, Дархан, Эрдэнэтийн цахилгаан станцууд болон бусад хэрэглэгчдийг нүүрсээр ханган ажиллаж байна. Техник тоног төхөөрөмжийн парк нь ЭКГ, ЭШ маркийн экскаваторууд, ТЭМ маркийн локомотивууд, Кат, Комацу, Хитачи, Хово маркийн автосамосвалууд болон бульдозерээс бүрдэнэ. Уурхай нь 2001 оноос хойш Үндэсний ТОП-100 аж ахуйн нэгжээр шалгарч байсаас гадна олон удаагийн үзүүлэлтийн наградыг хүртсэн.